Wednesday, November 14, 2007

tangthu

CHINGNU LAUKHA!
By Elty


Delhi a India President tenna inn kongkhak apan metre 200 vel a gamla,Raisina Mual vum laitak ding a om, ka office ka tun chiang in, zingsang dang bang lou takin, thoupi khat in hong vel vut vut hi. Betlup zok kasawm hang in, amah ut lou hia, kei siamlou ka hiam,sawtpi ka lulam,ka khelam hong vel nilouh hi.Chimoh sim in ka tusuk a, ka chair a kingai in,ka room tung sangtak mai te ka entou hi.Koi a hong kipan hida hia, kong teng leh tukvelh teng lah kikhak vek a ka chi lungsim hi. A tawpin, AC apan hi ding hive e chin,a thou pen hong kilatnawn ka ngak hi.
Thakhat in, ka neuchik lai a ka nu’n ahonhilh, ‘thoupi in a hong velh chiang in, nang hon ngaina a sisa te in hon ngaihtuah uh ahi chihna in kingai hi’ achih ka thei khe guih a,ka tutna ah ka tutang tou hi.Ka gei a Calender ka en a,November nikhat(November 1,2007) ahi a,ka lungsim in,KUT ni ahi chih ka thei pah a,ahizong KUT ni a ba thoupi in hong delh laizang ding,chin hiai ni a thil tung kei hinkhua a poimoh bang om ding hiam chin ka ngaihtuah zom tou zel hi.
Mitsi a dai dide a ka ngaihtuah lai in,College ka kaitung kum 35 paita a ka tangthu gelh ‘Chingnu Sihna Kua Mohpuak Hiam? chih hong kilang a, Kohima Khopi a ka omlai nite hong kilang zung zung hi. Huai tangthu ka gelh lai a ka lungsim ngaihtuahna te leh ka tenna inn te, ka dohkan leh ka tutna te ka ngaihtuah lai in, Ngaidih, Kek-kia bang mai in ka lungsim a hong kisat zawtzawt a,meipi kal ah ‘aw’ neem takin, ‘Jupiter, tuni mangngilh ta maw?’ Numei khat in hong chi hin kaza hi.Ke guih in, ka dohkan ah ka khut ka koih suk a, ka taltang ka khut nunglam a koih in,ka kunsuk a,imvuallouh in a ngaih a ngaih in ka lungsim ah ‘CHINGNU !CHINGNU! hong kichi khe zot zot hi.Ka mit te pan khasiatna mit tui a hong lung khe zoih zoih ua, ken leng kham sawm lou in, a luan luan in ka luang khe sak ziah ziah a,ka khut zung te kal a lum hithit in a luang suk a, ka dohkan a su kot hial uhi.
Huai tangthu a ka Chingnu sihni tuni mah ana hive le chih ka phawk khia a,ka lungsim in ‘Ching aw, hun sawt hon la na chia le..? chi in a nuai a a thugen te lungsim leh chitaktak in, dai dide in ka ngai khia hi:
“Jupiter aw, 1983 a Darjeeling apan ka laithon ah thu tamtak gen mah leng,nang apan ka selguk thil khat om a,tua in ka hanmun na ngon ah ka omnuam lou sak gige ahihman in,sihna nuam ka neih a, ka kha a tawldam taktak na ding in,huai thuguk gen dia hong zing hoh ka hi hi.Hon ngaisiam inla, ka thugen hon ngaihkhiak sak in. November 1,1983 a ka kikhailup ma kal khat vel in huai lam a mikhat toh nau numei khat ka nei a,tuapen ka awklup ma in,nang bang a Pathian atheikha mikhat kiang ah kava nusia a,ahihhang in, ka awklup khit nungtan in,tua ka tanu ka mangngilh thei kei a,ka han mun apan a sun azan in ka gal et et hi.A enkawl pa’n kei a hon ngaihnat tei mahmah ziakin,ka tanu min din CHINGNU mah asa a,hoihtakin a enkawl a, Pathian lau leh omdan hoihtak nei in,amah ta ngeingei bangin a enkawl a,school hoih pen te ah a kaisak a,zilna hoihpen te apia a,adiakin, music bang a siam sak a,a hong khanlet deuh deuh chiangin,a veng ua lasak siam a theih bang hong hi hialta hi.A mel leh puam hong piching a, ka gintak sang mah in leng etsuak leh nun hoih in a hong khang lian a, I ngeina bang in tangval bang leng hunkhop a deih a om uhi.Ken bel ka lungsimin, a lasak mah lim bawl henla, nekmuh theihna khop din tha honsuah leh chih ka na deihsak a,lah a kiang ah a takin kava gen thei si kei a,ka omdan haksa kasa mahmah hi.Anu kei ka hih lam leh ka thulimlouhna thuakzoulou a awklum ka hi chih bang a theih ding ka lau mahmah ziakin, ka tanu kiang nai ah leng ka om ngam kei hi.A enkawlpa’n hoihtaka etkawl nak leh kei mithulimlou in hihding leh gen ding ka nei kei mah ahi chih ka kithukhitna ahi.Ahihziakin, ka hihtheih tawktawk in,lamkal apaina te, amah kia a omkhak hunte in ka kha in kava umkual zel a, ataksa tung a haksatna athuakzohlouh ding a tun louh teitei ka sawm ahi.Tuni tannin, huchibang haksaluat na zen zaw a tung ngei kei.Ahihhangin, a lungsim ngaihtuahna a ngeek a,mi ngaihnatna a lian a, midang te itna leh khotuahna te a ngaisang gige a,huaiziakin, la dangdang sang in leng ki itna la(love songs) te asa nuam zaw hi. Leitung ah ki ittuahna loungal a thupi a om kei a, inkuan khosa thei in, hausa in laisiam mahle hang,ki ittuahna I neih kei le zaw tua te bang mah pi hilou jel uhi.Ka tanu in leng huchibang ngaihtuahna a nei a, anu hinkhua a itna diktak a omkhak ngeilouh ziak a,mahni ki thahna tan bang tung a hih ziak leng hikha mai din ka gingta hi” achi hi.
Ken leng a thugen thuakzou nawnlou in, ‘ahih leh bang achia hiai na thuguk tu kum 30 zen bei nung a na hong gen ?,bang hih leng hon chi na hia ?’ ka chi hi.Ka gen zom zel a ‘na tanu ahi chih bang chi’n ka thei dia, amah lah mungei lou ka hih chian ?’ka chi nawn hi.
Chingnu in ‘Jupiter, tuban hun sawtlou in ka tanu na mu ding a, a mel na muh chiang ngeingei in, hiai chu Chingnu Tanu ahi’ na chi ngam ding. A mah na kipahpih a,a la siamna te leh a mel hoihna te nana kipahpih louh ngal nang apan bang mah ka hon ngen kei’a hon chi hi.’Bang chin na hon ngetna te ka hon nial thei dia,na chih bang bang in thil a tung ding,Chingnu’ chi’n ka dawng hi.
Zinglam dak 11 bang hi ding hita, kintakin, RK Puram lam apan Airforce Auditorium manoh in Ring Road ah ka tai phei ua, Daula Kuan taipel in,veilam ah ka tai lut tou uhi.Hall mihing in ana dim vekta a,tutna ding mong mong leng om kei.Adiktakin,khe a sik na ding mun na ngawn leng a om kei.Huchilak pi ah,ka lungsimin, ‘ bangchin Chingnu ka mu kha thei dia?’ chin ka kidong hi.Hun bangtan hiam nung in,nungak aw hiam takin, ‘the best Female Vocalist (Country/Sentimental) award goes to..chin hong kikou a..the one and only Ms.CHINGNU’ achih chiang in,ka tutna apan rapture ding a gen bang hial un, thakhat in ka ding tou a,ka aw neih teng toh kipaklua in ka hong kikou khia a,huchi’n ka hong khanglou taktak ta hi.

source : www.zogam.com


No comments: